SHARE

Li te 9è nan aswè pot Yanvalou te gentan louvri pou resevwa moun ki soti tout kote pou vin asiste ak espektak “Etincelles” la. Yon espektak pou klotire Festival Feminis Nègès Mawon ki fèt ane sa a pou yon 2e fwa nan Pòtoprens.  Mizik ak pwezi te marye pou kreye yon anbyans amizman ak refleksyon.

Se Gaëlle Bien-aimé, reskonsab atistik festival la, ki te kòmanse espektak la. Li deklame kèk tèks “Jacques Prévert” tankou “Barbara, teks Marie Jose Ali, Rodney St Eloi ak Vanessa Jeudi ansam ak lòt teks original ke li ekri pou l pale de lanmou fanm ak lanmou an jeneral.

Li te marye pwezi li yo sou sèn nan avèk mizik. Sete bèl bagay. Soti nan Vanessa Jeudi ki chante “Four Womenyon mizik Nina Simone”, “Djannie, Emeline Michel” epi “Çà pleure aussi un homme, Ginette Reno”, Pase pran Gardyn Mercier ki chante “Defile, Ada”, “No, Meghan Trainor” jouk rive nan Charline Jean-Gilles ki chante “La moitié du ciel, Garou”, “Viv pi pre w, Kerby” ak “It’s A Man’s Man’s Man’s World”James Brown”. Sa ki tap fè premye pati espektak la.

Charline Jean-Gilles
Renette Désir

Piblik la te nan bòl grès li, Mizik, pwezi ak blag ap tonbe, souri ak kontantman fè mikalaw sou vizaj tout moun. Dezyèm pati espektak la te koumanse avèk Tamara Suffren.  Ak “Batistè” youn nan mizik li yo, li mete piblik Yanvalou an nan yon lòt dimansyon pou yo konprann pa gen kay san fanm, pa gen lavi san moun.

Renette Désir pat pran tan pou l vinn pote touch pal nan sa ki tap fèt la. Kòm sila ki pase avan yo tap pale de lanmou fanm, ak enpòtans yo nan kad festival sa, Li menm li tap rakonte n chak fanm bezwen “Loulou”. Plezi gaye, Renette ap pale de loulou sou loulou sou sèn nan. Nan lespwa atis la ta pral entèprete youn nan tit ki pi popilè li genyen ki se “Yanvalou”, li rezye tout moun poul ka envite medam yo vinn “Taye banda” avèl, yon mizik ki anonse pwochen albòm li an.

Erol Josue ak Stevy Mahy

Pèsòn pat atann espektak la tap gen kriye ladanl, men emosyon te parèt tout kòl lè Stevy Mahy vinn chante “Beautiful” yon mizik li te konpoze pou yon moun li renmen anpil. Toujou nan menm ribrik lanmou an li profite chante “Banm diw” pou yon moun ki te nan lavi l nan yon epòk. Tristès retire kòl nan afè moun pou fè plas ak Rara, Banbòch, Yayad, nan mitan Sèn nan lè Stevy ap chante “Grenn zaboka” menm Erol Josué ki se Direktè Biwo Nasyonal Etnoloji, ki se yon Dansè tou te oblije kite asistans lan pou vinn make pa sou sèn nan. Malgre li soti lwen men lèl Ayiti li santi li lakay la, pou sa Stevy fini spektak la ak yon tit “Haiti cherie” li konpoze pou Ayiti.

Se avèk anpil kontantman ke tout moun ap mete fen ak bèl espektak sa komite Festival Nègès Mawon te mete sou pye pou di pwen final ak seri aktivite yo ane sa. Kowòdonatris Pascale Solages te pwofite remèsye tout moun epi ba yo randevou ane pwochen pou yon lòt festival.

Comments

comments

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.